مبادرة جزار بأسيوط … اللحوم بالقطعة وتخفيض 40 جنيها بالكيلو وتخفيض أكبر في الأضحى

في شارع الهلالي بمدينة أسيوط بجوار سور نقابة المعلمين تلوح لافتة تحمل اسم جزارة أولاد رشيد والتي تم افتتاحها منذ العام 1985 ليعلن صاحبها الحاج أيمن رشيد البلكي خلال تلك الفترة عن بيع اللحم بالقطعة ليصل ثمن القطعة 25 جنيها بل وأعلن أيضا عن تخفيض 40 جنيها في سعر كيلو اللحم.

“الجريدة” التقت الحاج أيمن صاحب المبادرة الذي رفض أن يقف مكتوف الأيدي أمام جائحة ارتفاع الأسعار وهو يرى ما آل إليه حال المواطنين فقرر اتخاذ قرار حاسم للتصدي لهذا الارتفاع الهائل في الأسعار وأخذ يروي تفاصيل مبادرته شارحا:  غلو الأسعار هو سبب إعلان المبادرة “في ناس مش مقدرتها تشتري الكيلو أو النص لكن ممكن ياخد أربع قطع سعرهم 100 جنيه”

يتابع: المبادرة هي بيع اللحوم بلدي بالقطعة وسعر القطعة 25 جنيها فقط وأبيعها لحم صافي دون أي دهون فمن الممكن أن أضيف قطعة دهن في كيلو لحم أو أكثر إنما القطعة الواحدة هي لحم أحمر صافي تمام من الدهن “مش ملبسة ولا فيها حتة دهن انت بتعمل حاجة لله ياتعملها صح يامتعملهاش”، ووزن القطعة من 80 : 90 جرام وهي لأي شخص وغير مقتصرة على فئات معينة، “اللي جاي ياخد بالقطعة ده ظروفه لا حول ولا قوة ظروفه تعبانة لكن اللي ظروفه مرتاحة هياخد 2 ولا 3 كيلو”  كما أنني خفضت في ثمن سعر كيلو اللحم من 330 إلى 290 جنيها أي قللت 40 حنيها في الكيلو.

وتشهد هذه الفترة ارتفاعا كبيرا ملحوظا في الأسعار لأن أصحاب المزارع يبيعون لنا الماشية بأسعار مرتفعة فهناك زيادة 120% زيادة في السعر فالعجل الذي كان سعره 35 ألف جنيه وصل سعره اليوم 80 ألف جنيه وهذا جشع واستغلال، وأملي في هذه المبادرة تثبيت السعر الذي يرتفع بشكل ملحوظ والسبب في ارتفاع الأسعار أصحاب المزارع وليس الجزارين

يكمل حديثه: أعلنت عن المبادرة أمس على صفحتى على الفيس “يادوب نزلت البوست بالليل مفيش عشر دقايق لقيت السوشيال ميديا اتقلبت والتليفون ملطلش رن”، واليوم هو أول يوم في تطبيق المبادرة “لسه الناس معرفتش كتير” وهناك إقبال ملحوظ حوالي 60 أو 70 شخص اشتروا اليوم بالقطعة، والهدف منها هو مساعدة الناس “الناس ظروفها تعبانة واحنا بنعمل كده لوجه الله اللي جاي تعبان ومش مقدرته ومش ببص لخسارة أنا عايز أفرح الناس وأساعدهم وأساهم في التخفيف على الناس في الظروف الصعبة وأنزل السعر وأثبته”.

استياء وإصرار

أسعدت المبادرة المواطنين ولكنها أثارت غضب الجزارين وحول ذلك يتحدث: ” الناس مبسوطة جدا وكل اللي بياخد قطعة مبسوط لكن الجزارين زعلانين عشان نزلت في الكيلو 40 جنيه قالولي بتعمل خسارة بس هو لازم نساهم في الظروف الصعبة اللي احنا فيها وبنعمل كده برضو عشان نثبت السعر عشان السعر ميزدش عشان كل أسبوع في زيادة وأنا مستمر ومش هتراجع عن المبادرة”.

مفاجئة

أكد الحاج أيمن على استمرار مبادرته رغم أي ظروف بل وأعلن عن مفاجئة وهي أنه سوف يخفض أكثر في سعر اللحوم في عيد الأضحى “إن شاء الله هنزل في السعر على عيد الأضحى ومفيش تراجع عن المبادرة لأي سبب احنا إن شاء الله مستمرين الهدف هو مساعدة الناس ظروف الناس تعبانة”

دعم

وعن الداعمين يتحدث الحاج أيمن: لم يدعم أي من الجزارين المبادرة ولكن سعدت بتواصل نائب رئيس مجلس ومدينة الفتح طالبًا مني دعم الفتح وإفادة المركز من المبادرة “قال لي حتى لو يوم واحد في الأسبوع تنفذ المبادرة في مركز الفتح”.

أمنية

وحول أمنياته للمبادرة: أتمني دعم الناس للمبادرة “عايزين الناس تدعمنا عشان المبادرة تبقى ناجحة”، وأتمنى أن يطبق الجزارون المبادرة “عايزين الجزارين يشجعوا المبادرة ويعملوا زينا وينفذوها والسعر ينزل وعشمانين في ربنا المزارع تنزل السعر”.

وحول مستقبل المبادرة يؤكد: “مفيش تراجع إن شاء الله المبادرة مستمرة ماليش دعوة بحد أنا مع نفسي”، وأجمل ما أسعدنى اليوم دعوة الناس لي “الله يبارك لك”